أعلنوا النهاردة عن نموذج الذكاء الاصطناعي الجديد اللي بيطلقوا عليه اسم  GPT-4o

 هنا حرف الـ O اختصار الـ Omnimodel أو بمعنى آخر النموذج الموحد اللي فيه كل النماذج الذكية الخاصة ب GPT-4

النموذج الجديد هايكون متاح للجميع مجانا.. مش لازم تدفع عشان تستخدمه

 ، يعني النموذج ده بيقدر يتعامل مع النصوص، والصوت، والفيديو.

 الـ GPT-4o هيبدأ يظهر تدريجيًا في منتجات OpenAI خلال الأسابيع القادمة.

“ميراموراتي”، المدير التقني في OpenAI، قالت:  إن GPT-4o يقدم ذكاء بمستوى GPT-4 بس بقدرات أحسن من خلال وسائل مختلفة. 

أما في العرض المباشر اللي اتعمل في مكاتب OpenAI في سان فرانسيسكو، قالت إن GPT-4o بيشتغل على النص والصوت والرؤية، وده مهم جدًا عشان نتكلم عن مستقبل التفاعل بيننا وبين الآلات.

قبل كده، كان عندنا GPT-4 Turbo اللي كان بيساعد في تحليل الصور والنصوص، بس دلوقتي مع GPT-4o، الصوت بقى جزء من اللعبة.

لأنه بيفتح أبواب جديدة كتير، زي إنك تتكلم مع ChatGPT زي ما بتتكلم مع أي إنسان عادي. تقدر تقاطع ChatGPT في نص الكلام كأنها محادثة عادية، و النموذج الجديد بيقدر يلتقط نغمات وترددات صوتك ويرد عليك بأسلوب معبر وحتى لو كان انه يغني.

كمان بالنسبة للرؤية، لو عندك صورة أو شاشة كمبيوتر، ChatGPT هايقدر  يجاوب بسرعة على أسئلة زي “إيه اللي بيحصل في الموقف ده” أو “الشخص ده لابس تيشيرت لونه ايه؟”. وكمان، في المستقبل، ممكن ChatGPT يتفرج على مباراة رياضية بشكل مباشر  ويشرح لك القوانين.

اللي بتتميز بيه نسخة GPT-4o إنه بيشتغل بلغات أكتر وأفضل في حوالي 50 لغة، ويقدم أداء أسرع وأرخص من GPT-4 Turbo في واجهة برمجة التطبيقات بتاعت OpenAI. 

ممكن يكون الصوت مش متاح لكل العملاء دلوقتي عشان مخاوف الاستخدام السيئ، لكن هيتم تدعيمه لمجموعة محدودة من الشركاء الموثوقين قريبًا.

ابتداءً من اليوم ، GPT-4o هايكون متاح في النسخة المجانية من ChatGPT، وللمشتركين في خطط ChatGPT Plus  و Team بخمس مرات ضعف الحد الأقصى للرسايل. وكمان التجربة الصوتية الجديدة هتكون متاحة قريبًا لمستخدمي Plus، بجانب خيارات موجهة للشركات.

كمان أطلقت واجهة مستخدم جديدة لـ ChatGPT على الويب، وتطبيق لسطح المكتب على macOS بميزة إنك تسأل عن طريق اختصار لوحة المفاتيح أو تناقش بالاسكرين شوت

مستخدمي Chat GPT Plus هيكونوا أول اللي يجربوا التطبيق،

وكمان مكتبة GPT Store اللي فيها الشات بوتس اللي مبنية على نماذج الذكاء الاصطناعي بقت متاحة للمستخدمين المجانيين لـ ChatGPT، وكمان يقدروا يستفيدوا من مميزات ماكانتش متاحة، زي القدرة على تذكر التفضيلات للمحادثات المستقبلية.